मुंबई विद्यापीठाच्या 43 व्या युवा महोत्सवाच्या अंतिम फेरीला सुरुवात झाली आणि समस्त युवा महोत्सव प्रेमींनी चर्चगेटचं क्लब हाऊस म्हणजेच विद्यापीठाचं कल्याण केंद्र गाठलं आहे. पात्रता फेरीतून उल्लेखनीय, अत्युत्तम स्पर्धक अंतिम फेरीत दाखल झाले आणि आता यात सहभागी झालेल्या तुल्यबळ स्पर्धकांची, त्यांच्या विद्यालयांची टक्कर.. आणि गेल्या वर्षाची खुन्नस यातून पुन्हा एकदा नव्याने फेस्टिव्हल बोनान्झा सुरू होईल.
मुंबई विद्यापीठाच्या 43 व्या युवा महोत्सवाच्या अंतिम फेरीला नुकतीच सुरुवात झाली आणि मुंबईतल्या समस्त युवा महोत्सवप्रेमींनी चर्चगेटचं क्लब हाऊस म्हणज विद्यापीठाचं कल्याण केंद्र गाठलं आहे. पुढे आठवडाभर जर तुम्ही त्यांना फोन केलात तर एकच उत्तर मिळेल, अरे जरा क्लब हाऊसमध्ये आहे रे. आज ‘वन अॅक्ट’ची फायनल आहे आणि उद्या स्किटची. एक काम कर नेक्स्ट वीकमध्ये पक्का भेटू. सध्या जरा बिझी आहे.
शिक्षण पूर्ण होऊन नोकरी-व्यवसायात रुळलेले कितीतरी एक्स-स्टुडन्ट एक दिवस तरी या काळात इथे हजेरी लावतात. 180 हून अधिक महाविद्यालयांनी सहभाग घेतलेल्या युवा महोत्सवाच्या पात्रता फेरीतून उल्लेखनीय, अत्युत्तम स्पर्धक अंतिम फेरीत दाखल झाले आणि आता यात सहभागी झालेल्या तुल्यबळ स्पर्धकांची, त्यांच्या विद्यालयांची टक्कर.. आणि गेल्या वर्षाची खुन्नस पुन्हा एकदा नव्याने सुरू होणार आहे. महाविद्यालयाला जिंकवण्यासाठीची जिद्द, जीव तोडून घेतलेली मेहनत हे सारं काही पुन्हा एकदा युवा महोत्सवाच्या निमित्ताने आपल्याला अनुभवायला मिळणार.
विद्यार्थी कल्याण केंद्रातील शाहीर अमरशेख सभागृहामध्ये टीव्ही व चित्रपट अभिनेता ‘राजा शिवछत्रपती’ फेम डॉ. अमोल कोल्हे यांच्या उपस्थितीत 43 व्या युवा महोत्सवाच्या अंतिम फेरीचा उद्घाटन सोहळा पार पडला.
आतापर्यंत वक्तृत्व स्पर्धा, वादविवाद स्पर्धा, रांगोळी, भारतीय समूहगीत, मराठी एकांकिका स्पर्धा, क्लासिकल इन्स्ट्रमेंटल,ऑन द स्पॉट पेंटिंग, पोस्टर मेकिंग आदी स्पर्धा झाल्या. त्यापैकी ‘नक्षलवाद : कारणे आणि उपाय’ या विषयावरील वक्तृत्व स्पर्धेमध्ये काही विद्यार्थ्यांनी नक्षलिझमचा सखोल अभ्यास केल्याचं दिसून येत होतं. सदर स्पर्धेत रुपारेल महाविद्यालयाला प्रथम क्रमांकाचं, साठय़े महाविद्यालय, विलेपार्लेला द्वितीय तर वझे-केळकर महाविद्यालयाला तृतीय क्रमांकाचं पारितोषिक मिळालं. रांगोळी स्पर्धेत कणकवलीच्या एस.पी.के. महाविद्यालयाने प्रथम क्रमांक पटकावला तर दुस-या आणि तिस-या स्थानाचा मान अनुक्रमे रचना संसद आणि ए.व्ही. श्रॉफ महाविद्यालयाला मिळाला. इन्स्ट्रमेंटलमध्ये डोंबिवलीच्या मॉडेल कॉलेजने प्रथम क्रमांक पटकावला. एकांकिका स्पर्धा ही युवा महोत्सवातील मानाची स्पर्धा, विद्यार्थ्यांच्या हाऊसफुल गर्दीत संपन्न झालेल्या मराठी एकांकिका स्पर्धेत रुईया महाविद्यालयाने बाजी मारली. ‘व्रिडॉल सिम्प्सटम, नेट सॅव्ही आणि मोबाइल फ्रीक अर्थात इलेक्ट्रॉनिक वस्तूंच्या जंजाळात गुरफटलेल्या आजच्या पिढीची कथा सांगताना आज जग जवळ आलं तरी माणूस कसा दूर गेला याचं उल्लेखनीय सादरीकरण रुईया महाविद्यालयाने केलं. द्वितीय क्रमांक खालसा महाविद्यालय आणि जोशी बेडेकर महाविद्यालय यांना विभागून देण्यात आला तर चांगू काना ठाकूर महाविद्यालय (सीकेटी) याच्या ‘ओम श्वानाय नम:’ या एकांकिकेला तृतीय क्रमांक देण्यात आला. 5 सप्टेंबपर्यंत चालणा-या अंतिम स्पर्धामध्ये हिंदी वन अॅक्ट अर्थात हिंदी एकांकिका स्पर्धा, मराठी आणि हिंदी स्किट फोक डान्स यासारख्या स्पर्धा आगामी आकर्षण ठरतील. तर मग मित्रहो, सज्ज व्हा युवा महोत्सवात सहभागी व्हायला. कदाचित त्यात तुमचंही नाव असेल
